Cerca de 400 efectivos velarán pola seguridade das Festas do Apóstolo

0

Compostela, 11 de xullo do 2019 – O concello de Santiago celebrou a primeira Xunta Local de Seguridade de esta lexislatura coa seguridade das Festas do Apóstolo como tema prioritario.

A Xunta contou coa presenza da subdelegada do Goberno na Coruña, Pilar López-Riobóo que xunto co alcalde, Xosé Sánchez Bugallo, presidiron a reunión. O dispositivo de seguridade, explicou o alcalde, “será semellante ao dos anos pasados”, contando coa Policía Local e a Policía Nacional, tanto cos efectivos da comisaría de Santiago como cos da UIP. “Entendemos que será unha dotación suficiente”, engadiu. Preguntado sobre o número concreto de axentes, o rexedor calculou sobre 280 policías nacionais, sobre 100 policías locais e uns 70 da unidade de intervención.

Unha cidade segura

Santiago é un concello no que nos últimos dous meses se constata unha diminución na maioría de delitos denunciados. A subdelegada do Goberno, Pilar López-Riobóo, subliñou que estamos “nun concello seguro”. Ademais, mostrou a súa confianza en que todo o traballo dos efectivos implicados chegue a bo porto e as festas se desenvolvan sen incidentes.

Os Fogos

Con relación aos fogos do Apóstolo, o alcalde informou que, de acordo coa normativa legal, xa está solicitada a autorización. Adiantou que será o último ano no que se botarán os fogos dende o tellado do Concello: “foi unha solución provisional que se habilitou no seu día durante as obras da Catedral, que podemos dar por válida durante un período temporal acotado”. Argumentou a decisión na repercusión mediática, “moito maior se os fogos son dende a Catedral”, e nos riscos, moito máis altos no Concello, xa que a estrutura dos teitos é de madeira, e na Catedral é de pedra.

Xunta local de seguridade

SONY DSC

O rexedor engadiu que “a partir de xa abordaremos este tema coa Xunta de Galicia, coa Dirección Xeral de Patrimonio e co propio Cabido da Catedral”. Estudarán as posibles solucións para a súa ubicación, “pero o meu criterio é que o próximo ano os fogos se vexan dende o Pazo de Raxoi proxectados na fachada da Catedral”.

Móbiles e ocupas

Na reunión tamén se fixo un repaso da situación e dos cambios dende a última Xunta Local de Seguridade, celebrada no mes de maio. A evolución, sinalou Bugallo, “é positiva, cunha redución do número de delitos denunciados”. A única excepción son, segundo explicou, “os furtos de móbiles vinculados aos concertos do Monte do Gozo, pero é difícil saber en que medida foron furtos ou perdas, porque se denunciaron cen furtos e apareceron sesenta móbiles extraviados”.

 

Tamén repasaron “a problemática derivada dalgunhas ocupacións que se están producindo na cidade por parte de determinadas persoas”. O alcalde clarou que é un tema que depende “dunha decisión xudicial”, e que as forzas de seguridade e o Concello non teñen competencias nin para presentar a denuncia, nin para actuar sen mandato xudicial. “Gustaríanos que se puideran ditar resolucións máis rápidas, porque estamos vendo ocupacións que se están prolongando meses e meses”, engadiu.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial