A Baña, 4 de setembro do 2020 – O IDAE deixa sen efecto a revocación da subvención concedida no seu día ao concello da Baña para renovar luminarias.
O Instituto dependente do Ministerio para a Transición Ecolóxica recoñece que A Baña presentou en tempo e forma, o 24 de xaneiro, unha solicitude para ampliar o prazo para contratar a empresa que está acometendo os traballos; ampliación recollida na propia convocatoria das axudas.
O Concello continúa adiante coas obras de substitución de 2.281 luminarias no municipio (das 2.327 puntos existentes) e contará coa axuda de 394.546,96 euros concedidos polo Instituto para a Diversificación e Aforro da Enerxía (IDAE) dependente do Ministerio para a Transición Ecolóxica.
A posibilidade de perder esta subvención xa fora debatida no pleno ordinario do mes de xuño, cando a oposición criticara a pouca celeridade do equipo de goberno para cumprir os prazos. No mesmo pleno, o secretario da Corporación avanzara que o Concello solicitara en tempo e forma unha ampliación de prazo e que, ao non ter resposta do IDAE, esta considerábase outorgada.
Na resolución remitida agora polo director xeral do IDAE, o organismo dálle a razón ao Concello da Baña, sinalando que as propias bases da convocatoria recollían a posibilidade de pedir unha ampliación de prazo, que se solicitou incluso antes de que rematara o prazo inicial.