Padrón, 4 de xullo do 2018 – O Festival Abride a fiestra, promovido pola Casa-Museo Rosalía de Castro, homenaxeará a autora os días 14 e 15 de xullo co apoio da Consellería de Cultura, a través da Secretaría Xeral de Política Lingüística.
Abride a fiestra foi presentado no mesmo cuarto no que morreu a escritora e no que, segundo a súa filla, pronunciou as derradeiras verbas “Abride a fiestra que quero ver o mar”. No acto participou o secretario xeral de Política Lingüística, Valentín García, o presidente da Fundación Rosalía de Castro, Anxo Angueira; o alcalde de Padrón, Antonio Fernández; a vicepresidenta da Deputación da Coruña, Goretti Sanmartín; e mais as representantes do vermú Petroni e das adegas Paco & Lola, Cristina Codesido e Laura Cachón, respectivamente. O titular de Política Lingüística felicitou á fundación pola iniciativa “que contribúe a seguir proxectando a figura rosaliana como figura central das letras galegas, tendo a Padrón como localidade anfitrioa desta celebración pero facéndoa tamén extensiva a outras”.
Abride a fiestra terá como previa o venres 13 a inauguración da mostra Rosalía en Carril, no Museo do Ferrocarril desta localidade, recitado e dramatización poéticas e mais concerto; á que seguirá o sábado 14 a Inchadiña Branca Vela, a xa tradicional subida en dorna a vela desde Valga a Padrón organizada en colaboración coa Asociación Cultural Dorna da Illa da Arousa; e o día grande o domingo 15, data do pasamento de Rosalía de Castro, coa xornada de portas abertas Rosalía en Festa na Casa Museo, con concertos, proxección de filmes, poesía, regueifa e feira de produtos rosalianos e visitas guiadas por persoeiros e especialistas rosalianos. Entre as artistas que participarán estarán Mercedes Peón, Najla Shami, Cintaadhesiva, Habelas Hainas, Margarita Viso ou a Coral Padronesa.
Toda a información no web hhhtp://rosalia.gal.