A Rapa das Bestas de Sabucedo trasládase a agosto

0

A Estrada, 13 de maio do 2020 – A Rapa das Bestas de Sabucedo, que tradicionalmente celébrase no mes de xullo, traslada a festa para os días 15 e 16 de agosto.

A Asociación A Rapa das Bestas de Sabucedo tomou a decisión tras consultar coa veciñanza. As datas de agosto son provisionais e unha consulta posterior decidirá si a situación sanitaria permite a celebración.

A directiva propuxo a anulación das datas habituais, xa que considera que sería moi precipitado e inviable para a preservación da saúde. Ao mesmo tempo optouse por adoptar un período de agarda e darse tempo para comprobar a evolución da pandemia e das distintas fases da desescalada.

A proposta foi apoiada maioritariamente pola parroquia, que será convocada no mes de xullo a unha xuntanza para determinar se a edición 2020 se suspende definitivamente ou celébrase os citados 15 e 16 de agosto. En caso de que Sabucedo opte por esta alternativa, todo dependerá loxicamente das autorizacións dos responsables sanitarios e das administracións públicas.

A Rapa das Bestas naceu en pandemia

O equipo rector de A Rapa das Bestas de Sabucedo lembrou que esta celebración secular “naceu, segundo a cultura popular, en época de peste e superou a Gripe Española de hai un século ou acontecementos tan terribles como a Guerra Civil, polo que agora afrontamos unha nova dificultade que ben seguro imos superar atendendo á máxima que nos guía, que é o coidado e o amor ás bestas do monte como membros da nosa comunidade e do noso modo de vida”.

Por elo, e recalcando que a seguridade sanitaria e a preservación da saúde determinará calquera decisión, a directiva cre que a edición 2020 da Rapa debería celebrarse, aínda que fora nas datas alternativas de agosto, “pola importancia de manter unha tradición secular, polo imprescindible coidado dos cabalos e do seu benestar coas tarefas de desparasitación e rapa das crinas e pola necesidade de cumprir cos parámetros administrativos e legais da identificación e conteo das reses con respecto ás esixencias das administracións públicas ou da empresa aseguradora”.

Finalmente, tanto a directiva como a parroquia de Sabucedo, que quixeron expresar a súa tristura e condolencias polos milleiros de falecidos polo coronavirus, informaron de que van anunciar publicamente este aprazamento na súa páxina web e nos seus perfís oficiais en redes sociais para evitar a presenza de público na parroquia a primeira fin de semana de xullo, xa que a festa soe acoller a entre 20.000 e 30.000 persoas cada ano.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial