Solpores no Lagoreiro, aposta cultural desde A Estrada

0

A Estrada, 29 de xullo do 2020 – Unha nova iniciativa privada ven a dinamizar a cultura da Estrada, e da bisbarra, baixo o nome de Solpores no Lagoreiro.

Xoel López, Marlango, Mikel Erentxun, Rayden, Tanxugueiras e Fredi Leis actuarán este verán na Casa do Lagoreiro, un espazo do que toma o nome o ciclo. O local acollerá nos seráns de agosto e setembro numerosas citas culturais no seu xardín exterior coa posibilidade de degustar algúns dos pratos máis destacados do seu restaurante.

Solpores no Lagoreiro, aposta cultural desde A EstradaOs humoristas Luis Piedrahita e Goyo Jiménez tamén participarán na serie de eventos, que comezarán o vindeiro luns 3 de agosto cun concerto do rapeiro Rayden no marco da súa nova xira #LosNuevosAgostos.

Todas as actuacións, cuxas entradas sairán proximamente á venda, comezarán ás 21.00 horas e contarán con capacidade limitada ademais de indicacións visuais para o tránsito. O servizo do Restaurante do Lagoeiro atenderá ao público durante os espectáculos, garantindo así o goce da iniciativa e o cumprimento dos protocolos de seguridade.

Solpores no Lagoreiro, aposta cultural desde A EstradaProgramación

A primeira visita á Casa do Lagoeiro será a de Rayden, quen actuará o luns 3 de agosto no marco da súa nova xira #LosNuevosAgostos, unha iniciativa exclusiva que o madrileño pon en marcha este verán co gallo da nova normalidade. As entradas para o concerto inaugural xa están á venda na plataforma www.enterticket.com. O poeta e rapeiro, quen vén de lanzar un EP inspirado na serie La casa de papel, é un dos músicos máis influíntes da súa xeración grazas a súa proposta de creacións viscerais e sen etiquetas.

Dez días despois, o xoves 13 de agosto, Mikel Erentxun presentará o disco El último vuelo del hombre bala. O cantante do mítico grupo Duncan Dhu, referente do rock español nos anos 80, é un dos artistas con máis carisma e versatilidade do panorama musical e no xardín da Casa do Lagoeiro ofrecerá un concerto inesquecible para as e os incondicionais do seu talento.

Os Solpores no Lagoeiro continuarán á semana seguinte con dous pratos fortes do ciclo: o humorista Luis Piedrahita (21 de agosto) e Marlango (23 de agosto). O dúo conformado por Leonor Watling e Alejandro Pelayo dará a coñecer en acústico o seu álbum Technicolor, co que levan xirando por salas e teatros nos últimos tempos.

Xa na última semana do mes, o xoves 27 será a quenda do cantautor galego Fredi Leis, autor de éxitos coma Mariposas ou Quiero darte, mentres que o día 30 as voces e pandeiretas de Tanxugueiras, que veñen de esgotar as entradas para o seu concerto no TradFest, presentarán o seu segundo disco, Contrapunto.

En setembro rematará a primeira edición do ciclo. O 6 de setembro Xoel López, un dos músicos máis recoñecidos do pop-rock iberoamericano, presentará algúns dos temas do seu novo álbum que se publicará no outono e dos que xa se coñecen singles como Alma de oro. Finalmente, o cómico Goyo Jiménez pechará os Solpores no Lagoeiro o sábado 12 de setembro.

Acceso ao recinto e venda de entradas

Todos os concertos e espectáculos de Solpores no Lagoeiro celebraranse no exterior da casa, nun xardín preparado especificamente para cada actuación e no que se darán todas as garantías de seguridade para poder gozar da iniciativa á vez que se cumpren os protocolos sanitarios. Así, a capacidade do recinto será para 220 persoas e cada actuación comezará ás 21.00 horas, aínda que se abrirán as portas contra ás 19.30 horas. O espazo contará con indicacións para o tránsito e con xel hidroalcohólico á disposición das e dos asistentes, que deberán levar mascarilla. Ademais, o público sentarase en función dos convivintes ou unidade familiar e contará cunha mesa na que o servizo do Restaurante do Lagoeiro servirá as bebidas. Todas aquelas persoas interesadas en cear durante as actuacións deberán facer, previamente, a súa reserva. As entradas para cada actuación dos Solpores no Lagoeiro, que conta coa colaboración de Mahou, Petroni e Aleata, sairán proximamente á venda, no mes de agosto, agás no caso dos billetes para o concerto de Rayden, que xa se poden adquirir a través da plataforma www.enterticket.com.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial