A Estrada, 6 de maio do 2020 – O BNG da Estrada ven de solicitar a convocatoria de forma urxente do Consello Económico e Social.
A concelleira Susana Camba insta ao alcalde da Estrada a convocar o Consello xa que “Desde o BNG cremos que este foro é o máis acaido para, entre todos e todas, ver que medidas se poden tomar para paliar a crise económica que xa está aquí, entre nós”.
No Consello Económico e social están representados os partidos políticos, entidades sectoriais e sindicatos. Camba explica que “Cremos que o Consello Económico e Social ten que servir para algo máis que xuntarse unha vez ao ano para determinar os festivos locais, ten que servir para presentar propostas de actuación e consensuar unha resposta conxunta á crise económica”.
A concelleira do BNG, Susana Camba, tamén quixo manifestar que “o BNG aposta pola colaboración sincera para superar esta pandemia e as súas consecuencias”. “Agardamos do goberno municipal a mesma actitude” engadiu, “se nos chamamos a unha porta e esta non se abre, dificilmente superaremos esta crise”.