Compostela, 15 de xaneiro do 2019 – Terceiro ano no que a Gentalha do Pichel pon en marcha o seu certame de música para bandas emerxentes con presenza feminina, o Eclosom.
O Eclosom naceu para dar visibilidade a grupos que teñan presenza feminina e canten en galego. Nos últimos anos son cada vez máis as bandas formadas por mulleres ou nas que participan pero desde a Gentalha seguen pensando que é preciso buscar máis visibilidade.
Desde o centro autoxestionado tamén consideran que o Galego pasa como lingua por un estado crítico de perda continúa de falantes. algo que repercute tamén na música. Din observar un certo estancamento no nacemento de novas bandas e a falta de relevo para as xa consolidadas. Un motivo máis para impulsar o certame.
A Gentalha está inmersa na actualidade na construción dun local de ensaio e por iso o premio para a banda gañadora, ademais do económico e a actuación na Festa do 17, será o uso gratuíto do local durante un ano.