A hostalaría segue na rúa

0

Compostela, 25 de febreiro do 2021 – A hostalería volveu este mércores a protestar nas rúas de Compostela e mantense fora das negociacións coa Xunta.

O goberno autonómico continúa tendo como referente ao Cluster do Turismo. Desde o sector consideran que se trata dun ente creado para negocios como hoteis, empresas de actividades ou casas de turismo rural pero non para a hostalería.

Manifesto

Asociacións de toda Galicia se manifestaron en distintas cidades no día de onte. En Compostela reuníronse moitas da bisbarra que camiñaron xuntas ata a Praza da Quintana. Os representantes da hostalería leron un manifesto que foi común para toda a comunidade autónoma.

No documento lémbrase unha vez máis que se trata dun sector que “afecta a todo o tecido empresarial dos pobos: os propietarios dos negocios, os empregados, os provedores (alimentación, bebidas, panadarías, froitarías, carnizarías, peixarías, lavandarías, servizos técnicos…), o sector primario (gandeiros, mariscadores, agricultores, viticultores…), pequenos propietarios dos baixos e todos os demais comercios, todos ligados nunha economía interdependente, circular”.

Destacan tamén que o sector da hostalería “a diferenza doutros, viuse paralizado pola decisión da Xunta de Galicia, decisión sanitaria que nós aceptamos se é polo ben común, pero que non vén acompañada de decisións económicas como si se está a facer noutros países”.

O manifesto da hostalería concreta as demandas en dúas cuestións. Por unha banda rexeitan “a criminalización do sector, sinalado como foco de infección e de descontrol” xa que cumpriron sempre coas medidas impostas. E por outro lado considéranse empresas intervidas polo goberno ao impedirse que realicen a súa actividade, por esta razón reclaman un plan de rescate sectorial.

Fondos europeos

O manifesto da hostalería engade que España recibirá da Unión Europea 140.000 millóns de euros e esixen “claridade na súa distribución, que non se faga por clientelismo, amiguismo ou que vaia a parar a grandes empresas con capacidade de presión. Hai que rescatar ás persoas, á economía real, a de centos de miles de pequenas empresas, de autónomos e dos seus traballadores”.

Datos

O documento lembra ademais que a hostalaría representa o 7% do PIB de España; que emprega a 1,7 millóns de persoas (o 9% do total nacional) e hai 315.000 locais abertos cunha facturación de 125.000 millóns de euros.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial