Ordes, 23 de xaneiro do 2019 – A Rede de plataformas medioambientáis Salvemos a Comarca de Ordes. Aire, auga e terra limpas ven de reclamar información sobre os proxectos que Naturgy, antiga Fenosa, ten previsto desenvolver tras o peche de Meirama.
Salvemos a Comarca de Ordes considera unha boa noticia o peche dun dos puntos contaminantes de todo o estado español. Mostran tamén a súa preocupación polas informacións publicadas sobre a posible instalación dun parque eólico e unha planta de biogas.
A Plataforma reclama que “tanto a empresa como as Administracións involucradas nestes proxectos exerzan as súas responsabilidades
de forma democrática e dean información detallada sobre cal é o plan que sucede ao peche da térmica. Exiximos transparencia absoluta e en tempo real e coñecer en que consisten exactamente eses proxectos e onde estarían ubicados”.
O colectivo lembra o sucedido nas Encrobas “Sería moi lamentable que despois de 40 anos da loita das Encrobas, os veciños e veciñas teñamos que volver coller os apeiros de labranza na man para defender de novo as nosas terras e o dereito a unha vida digna. Entendemos que
o peche da térmica debería implicar o total compromiso por parte da empresa para rexenerar e recuperar a zona danada durante todas estas décadas e a merecida devolución das terras a todo o pobo que se viu obrigado a marchar das súas casas ou a convivir con todos os prexuízos que trouxo a térmica para a zona sen nin sequera gozar da rebaixa no recibo eléctrico mensual nin de contraprestacións axeitadas”.
Salvemos a comarca fai repaso da situación en Ordes, saturada de puntos de almacenaxe de lixo “A nosa comarca alberga na Areosa (concello de Cerceda) o basureiro de toda Galicia, que pretenden agora tamén ampliar e vai camiño de
converterse no maior de Europa. Temos tamén enriba a ameaza dun novo vertedoiro en Lesta de residuos industriais non perigosos, ademais da planta de Gesuga que trata os animais mortos, e da incineradora de Sogama”. A Plataforma lembra que estas instalacións afectan directamente aos 36.000 veciños e veciñas da comarca “pero tamén moito máis alá, ao longo da conca do río Tambre, que abastece a Santiago de Compostela, e vai parar á ría de Muros e Noia. Facer medrar a industria do lixo cara á zona onde está a térmica implicaría afectacións tamén no val do Barcés e no encoro de Cecebre, de onde se abastece A Coruña”.