Compostela, 31 de maio do 2018 – A Cámara de Comercio de Santiago ven de asinar un acordo coa empresa Viaqua que ten como obxectivo establecer un marco xurídico para a colaboración de ambas entidades.
O acordo foi asinado por José Sierra, como presidente do ente cameral, e Julio Masid, director xeral de Viaqua. O convenio ten un ano de vixencia e servirá para a cooperación entre as entidades, a Cámara centrarase na defensa e difusión das actividades de Viaqua e a empresa convertese en socia dando un apoio continuado a entidade.
Julio Masid sinalou que con este acordo Viaqua, como empresa galega presente ao longo das catro provincias e na cidade de Santiago desde hai 47 anos, apoia á Cámara de Comercio e convértese nun exemplo para o resto das empresas da demarcación cameral, á vez que espera que esta acción sirva de “efecto chamada” para que outras compañías da contorna compostelá se asocien á entidade cameral. “As institucións son fortes na medida na que teñen o respaldo do sector empresarial”.
Pola súa parte, José Sierra agradeceu a colaboración de Viaqua e a súa implicación co futuro da Cámara de Comercio de Santiago. Ademais, explicou que este convenio terá o seu percorrido co desenvolvemento de accións concretas de interese común para ambas organizacións.