Compostela, 11 de maio do 2019 – O Consello de Administración da sociedade mercantil estatal Augas de las Cuencas de España ( ACUAES), do Ministerio para la Transición Ecológica, aprobou o documento descritivo para a licitación do contrato de redacción do proxecto, execución das obras e explotación da nova EDAR de Silvouta, en Santiago de Compostela.
A licitación será sometida a un procedemento de diálogo competitivo, sistema de adxudicación da Lei de Contratos do Sector Público, que permitirá atopar a solución innovadora que se axuste máis ás necesidades deste proxecto, cuxo obxectivo é realizar un tratamento eficiente das augas residuais, en cumprimento cos requirimentos de vertedura ao río Sar esixidos pola normativa vixente.
O primeiro paso do procedemento é a elaboración dun documento descritivo que sente as bases do contrato e que, coa súa publicación, permita a presentación de propostas, entre as que se seleccionarán varias coas que desenvolver o dialogo competitivo. Desenvoltas as propostas por cada un dos candidatos seleccionados, convidaráselles a que presenten a súa oferta definitiva, sendo seleccionada a que dispoña dunha mellor relación calidade prezo en base aos criterios de valoración dispostos na invitación (técnicos, económicos e de prazo).
