Ames, 31 de maio do 2018 – A Concellaría de Educación de Ames acaba de encargar un estudo para analizar o perfil socioeconómico e laboral das familias usuarias dos comedores escolares municipais, así como para coñecer a súa valoración deste servizo. O obxectivo é contar con datos que permitan revisar o regulamento dos comedores escolares, dos programa lúdicos e da Escola de Verán de cara aos próximos cursos
Este estudo é unha iniciativa xurdida do pleno extraordinario do Consello Escolar Municipal celebrado o pasado día 15. O Consello decidiu que antes de tomar decisións era preciso coñecer os perfís dos usuarios dos comedores escolares e dos programas de conciliación con datos reais e información detallada. No mes de novembro acordouse a actualización do regulamento da rede municipal de comedores que entrou en vigor o pasado 1 de febreiro. Desde o 2015 o servizo creceu nunhas duascentas prazas entre os 5 centros que usan o servizo.
O estudo encargado analizará o perfil das familias usuarias, tanto as correspondentes á renovación de prazas coma as novas solicitudes; a ocupación laboral dos membros da unidade familiar e os/as usuarios/as censados no concello de Ames. Así mesmo, analizará a valoración do servizo, co obxectivo de seguir mellorando. Para isto realizaranse enquisas aos máis de 1.200 usuarios/as de comedores. O estudo será realizado polo Instituto de Estudos e Desenvolvemento de Galicia (IDEGA) da Universidade de Santiago de Compostela, que xa elaborou o mapa de necesidades educativas do Concello de Ames. O prazo establecido para a súa elaboración é dun mes.