Ames, 25 de setembro do 2020 – Hai uns días comerciantes de Bertamiráns mostrábanse en contra do peche de algunhas rúas enviando un escrito ao concello. Agora o goberno municipal, tras reunirse con eles, cambia de opinión e manterá aberta as rúas Entrerríos e Ameneiral.
A reunión cos comerciantes celebrouse este pasado mércores. Dos 37 negocios convocados por carta o pasado 16 de setembro acudiron 14. En dita xuntanza participaron a concelleira de Promoción Económica, Ana Belén Paz, a concelleira de Mobilidade, Beatriz Martínez, e mailo concelleiro de Administración Xeral, Víctor Fernández
Dende o pasado mes de maio as rúas Entrerríos e Ameneiral, como outras do propio Bertamiráns e do Milladoiro, pechábanse ao tráfico rodado os sábado pola tarde e os domingos todo o día. Os comerciantes aducían no escrito presentado que ” non obteñen beneficio algún de dita iniciativa, polo que solicitan a apertura do tráfico rodado durante as fin de semana en ditas rúas”. Despois de escoitar ao asistentes, o Concello acordou a reapertura ao tráfico rodado nestas rúas, que terá efecto dende este mesmo sábado 26 de setembro. A concelleira de Promoción Económica explica que “en ningún momento vamos a poñer trabas ao comercio. Este Goberno a través do diálogo sempre atende as demandas que se lle plantexan”.
Criticas do Partido Popular
Coincidindo en día con esta reunión o Partido Popular de Ames emitía un comunicado no que se facía eco das queixas de algúns negocios e dos carteis que colocaban nos escaparates. na nota remitida desde os populares dicíase que “Os comercios e o sector da hostalaría está indignado coa pasividade e a falta de resolución do goberno socialista. Tras mostrar o seu cabreo ao alcalde socialista e a concelleira de Promoción Económica e ante a falta de solucións e a desidia, comerciantes e hostaleiros optaron por encher os seus escaparates e taboleiros de menús con carteis de protesta ante a inacción dos responsables políticos”.
O PP amiense cualificaba o peche de algunhas rúas de “incorrecto” e de medidas “propagandísticas”. En todo caso non quedaba claro a que rúas pertencían os carteis nin que número deles estaban colocados.