Ames, 8 de xaneiro do 2019 – A exposición de fotografía Sexual Revolution 2.2, de Juan Señarís, estará no Pazo da Peregrina de Bertamiráns, en Ames, ata o próximo día 31.
Organizada pola Concellaría de Cultura, Sexual Revolution 2.2 foi inaugurada o pasado 21 de novembro. Trátase dunha exposición fotográfica que esconde o seu contido en diversos paralelismos co seu nome. Primeiramente, porque se trata dunha exposición de fotografías dos órganos sexuais de flores e plantas silvestres. Outro de eses paralelismo atópase nas siglas do nome da exposición que coinciden coas dos apelidos do propio autor da exposición: Juan Señorís Rodríguez. Por último o 2.2 que ten que ver co número de fotografías: 22.
A mostra xurdiu polo interese do autor en que a maioría das plantas silvestres son comestibles. “Comecei a facerlle fotos para identificalas e así saber se eran comestibles ou non e algunhas saíron de moi boa calidade” relata Juan Señorís. Engade que “moitos amigos, sobre todo aqueles que traballan con plantas, animáronme a publicalas, e de aí naceu a exposición”.
As fotografías estarán dispoñibles no Pazo da Peregrina de Bertamiráns para todo aquel que se encontre interesado nelas ata o 31 de xaneiro. Ademais, estarán acompañadas de diversos poemas de famosos artistas sobre a natureza e as súas peculiaridades, que se encontrarán a disposición de todos os asistentes para que os acompañen durante toda a exposición.