Ames, 26 de decembro do 2018 – O Concello de Ames, a través da Concellaría de Deportes, organiza durante o sábado 29 de decembro, a partir das 10.00 horas, o segundo Torneo de Nadal de fútbol sala 3×3 Concello de Ames.
O Torneo de Nadal de fútbol sala 3×3 desenvolverase no pavillón municipal do Milladoiro. Ao mesmo tempo organizaranse outras actividades deportivas durante decembro e xaneiro como son o II Torneo de Nadal de baloncesto e mailo II Torneo de Nadal de fútbol.
No torneo 3×3 haberá dúas categorías: absoluta (para homes de máis de 16 anos) e feminina (para mulleres de máis de 14 anos). Para tramitar as inscricións ou obter máis información pódese chamar aos números de teléfono 619 842 504 – 981 535 940. Tamén se pode enviar un correo electrónico ao enderezo deportes@concellodeames.gal. Haberá que entregar a ficha de inscrición cuberta e mailo resgardo de pagamento. As inscricións para participar permanecerán abertas ata o xoves, 27 de decembro, ás 14:00 horas.
Por outra banda, o II Torneo Nadal de Baloncesto Concello de Ames celébrase hoxe mércores 26 e mañá xoves 27 de decembro, nos pavillóns polideportivos municipais. Haberá competición nas categorías preminibásquet (2009-2010), minibásquet (2007-2008) e infantil (2005-2006).
Xa en xaneiro, os días 2 e o 3 dese mes, terá lugar o II Torneo Nadal de Fútbol Concello de Ames, o cal se desenvolverá nos campos de fútbol do concello. Para inscribirse hai que enviar un correo electrónico ao enderezo deportes@concellodeames.gal.
