Touro, 20 de abril do 2018 – A Asociación Aldea Viva reclama de novo que se cumpra a legalidade e que medio ambiente se interese por que tipo de residuos se verten na antiga mina de Touro.
Aldea Viva explica que na antiga mina de Touro acaban desde residuos de ENCE, a contedores de chapapote do Prestige, residuos urbanos e incluso fai as veces de vertedoiro “municipal”. A asociación lembra tamén, nun escrito remitido aos medios de comunicación, o intento de enterramento de reses mortas durante a crise das vacas tolas. A día de hoxe deposítanse ademais os tecnosoles producidos por empresas como Tratamientos Ecológicos del Noroeste S.L. (TEN) co que os terreos están cheos de todo tipo de residuos, mesmo plásticos ou envases de medicamentos que nos días de choiva os lixiviados destes materiais aos ríos é constante, e os cheiros permanentes.
Aldea Viva vén de presentar un escrito dirixido á Consellería de Medio Ambiente, para que requira á empresa TEN, S.L. e aos demais operadores a documentación que acredite, a través dos seus libros e rexistros, os residuos que depositaron na zona; facendo mención ao Decreto 59/2009 da Xunta de Galicia, polo que se regula a trazabilidade dos residuos, e que obriga aos xestores de residuos que realicen operacións de almacenamento, valorización ou eliminación, a levar un rexistro documental dos residuos producidos e/ou xestionados. A asociación tamén lembra á Consellería de Medio Ambiente a Lei 22/2011 de Residuos, que establece os principios da política de residuos e a protección da saúde humana e o medio ambiente por parte das autoridades, para que non se xeren riscos para as augas, o aire, o solo, nin se causen incomodidades por malos olores ou ruídos.
Neste contexto, e tendo en conta que segundo os propios datos das empresas, estas recepcionan milleiros de toneladas de residuos e de que se están substanciando xa varias denuncias, a Administración medioambiental galega, competente en materia de vixilancia e control, debera inspeccionar a zona de vertido dos residuos, os terreos da antiga mina de Touro, e comprobar se se están a cumprir as obrigas dos xestores relativas ao almacenamento, mestura e envasado dos mesmos, (artigos 18 e 20 da Lei 22/2011), e que así mesmo, se aplique no seu caso o réxime sancionador ao abeiro da Lei 26/2007 de Responsabilidade Medioambiental e cos principios de que “quen contamina, paga”.
