Ordes, 27 de xuño do 2017 – En menos de seis meses da súa posta en marcha a nova App para teléfonos móbiles do Concello de Ordes rexistra uns excelentes resultados con máis de 1.000 descargas entre os sistemas IOS e Android.
Este dato, unido ao posicionamento no buscador de Google Play tendo unicamente por diante o Concello da Coruña, pon de manifesto o grande interese que esta aplicación acadou entre a poboación.
A App caracterízase pola súa funcionalidade, facilidade de manexo e por un atractivo deseño. Entre as múltiples vantaxes que ofrece figura un servizo para comunicar incidencias ou calquera aspecto que se considere necesario, e que se pode complementar mediante fotografías e xeolocalización. Os usuarios e usuarias tamén poden enviar consultas e recibir avisos mediante notificacións push, acceder ás novas de maneira diaria, obter información do municipio e das parroquias, así como escoitar en directo Radio Ordes. A isto hai que engadir un amplos directorios telefónicos e de enderezos, ademais das localizacións de servizos, corpos de seguridade, sanitarios, datos meteorolóxicos etc.
Farmacias, autobuses…
Non faltan tampouco os horarios de autobuses, necrolóxicas, farmacias ou os servizos de garda. A través da axenda pódense consultar os actos e citas importantes coa posibilidade de integralos moi sinxelamente nas axendas. Tamén ten habilitada unha sección turística con información sobre hostalaría e restauración; hostais, hoteis e residencias; rutas e camiños, aspectos culturais como DesOrdes Creativas; ou mesmamente o Camiño Inglés.
Este servizo foi financiado integramente pola Deputación da Coruña.