Ames, 16 de xuño do 2017 – Este venres, 16 de xuño, a empresa Espina y Delfín comeza a xestionar o servizo municipal do Ciclo integral da auga en Ames. Onte o xulgado desestimou as medidas cautelares solicitadas por Acciona.
En agosto de 2015 celebrouse a primeira xuntanza da nova comisión do ciclo integral da auga co obxectivo de buscar unha fórmula de xestión do servizo municipal de saneamento e abastecemento de auga. Dende ese momento realizáronse varias xuntanzas para seguir avanzando neste eido coa elaboración dos pregos do novo contrato. Ao mesmo tempo, a comezos de novembro de 2015 a Xunta de Goberno Local aprobou a declaración do estado de emerxencia do Ciclo Integral da Auga para que a UTE Acciona Agua Espina Servicios prestase este servizo ata que finalizará o proceso de licitación do novo contrato.
Posteriormente, no pleno de abril de 2016 a corporación municipal aprobou por unanimidade os pregos técnicos que rexeron a licitación da xestión do servizo publico do Ciclo integral da auga. En novembro de 2016 a Mesa de Contratación, por unanimidade dos membros, propuxo a adxudicación da xestión deste servizo municipal á empresa Espina y Delfín SL, ao ser a que mellor puntuación obtivo en dito proceso. Esta proposta foi aprobada no pleno ordinario do pasado mes de decembro de 2016, mediante a modalidade de concesión administrativa por un prazo de 2+1+1.
De seguido, no pleno extraordinario celebrado o pasado 14 de febreiro aprobouse a suspensión do inicio da prestación do servizo do Ciclo integral da auga, que resultou do contrato formalizado o pasado 27 de xaneiro de 2017 entre o Concello e a empresa adxudicataria de dito servizo, Espina y Delfín SL, debido aos recursos de reposición presentados contra o acordo tomado en pleno o pasado 29 de decembro de 2016, de adxudicación da licitación da xestión do servizo público do Ciclo integral da auga.
A partir de aquí abriuse un período para resolver as alegacións e mailos recursos presentados a dito proceso, que se rematou no pleno celebrado o día 29 de maio coa aprobación da resolución dos recursos e alegacións presentadas durante o devandito proceso.
Coa desestimación das medidas cautelares solicitadas por acciona elimínase o último escollo para que Ames teña nova concesionaria. O xuíz indica no seu relatorio que a non suspensión fai que o recurso perda a súa finalidade e que a medida interesada si afectaría ao interese xeral xa que obrigaría a manter a prestación a unha entidade non adxudicataria. O xulgado sentenza que debe prevalecer o interese público en atender e asegurar a execución do contrato adxudicado sobre o interese económico da empresa, e de aí, que non se tomen en consideración as medidas cautelares.