Bisbarra, 19 de agosto do 2020 – Crece a preocupación polo incremento de casos de Coronavirus na área sanitaria Santiago Barbanza cos rebrotes de Melide e Muros.
En Melide hai 7 casos confirmados e controlados desde este luns. 4 dos positivos por Coronavirus déronse nun grupo de amigos menores de 30 anos e os 3 restantes son membros dunha mesma familia.
Hoxe mércores e mañá xoves está previsto facer un screening masivo a mozos con idades comprendidas entre os 18 e os 30 anos. As citas chegarán por mensaxe de texto ou chamada telefónica e realizaranse no Centro de Saúde de Melide.
Ordes
En Ordes non hai novos rebrotes pero o concello segue facilitando información regularmente a través da páxina de Facebook. A última de estas informacións, con datos contrastados pola comisión municipal de seguimento, fala de sete persoas en illamento domiciliario consideradas casos positivos. En total o concello tivo 23 positivos desde o inicio da pandemia.
Muros
Séguese tamén con preocupación o caso do cámping de Muros no que, según as últimas informacións do concello, hai cinco positivos. Esta semana realizáronse 69 pcr entre as persoas relacionados directamente con este rebrote e todas foron negativas.
Acatar as medidas
Todas as institucións insisten na necesidade de acatar as medidas sanitarias recomendadas. Uso de mascarilla, distanciamento e limpeza son as principais ferramentas para evitar o contaxio. En caso de dúbidas existe un número gratuíto, 900 400 116, no que informarse.