A Estrada, 2 de xaneiro do 2017 – O BNG da Estrada ven de poñer en marcha unha campaña de sensibilización e apoio ao comercio local do concello, nunhas datas nas que se dispara o gasto en moitas familias.
Esta campaña, na que participaron militantes do BNG e o concelleiro, Xosé Magariños, fíxose a pé de rúa e comercio a comercio, trasladando as propostas para o sector da formación. Ao mesmo tempo o BNG obsequiou aos comerciantes cuns autocolantes con mensaxes en galego para pegar nos agasallos que se merquen durante estas datas.
Según explican desde a formación nacionalista “apoiar o comercio de proximidade é unha das mellores maneiras de xerar riqueza para Galiza, de humanizar as nosas vilas. Está na nosa man modificar hábitos, potenciar a nosa economía e dar saída á produción galega, de extraordinaria calidade”. O BNG engade que “apostamos por prestixiar os nosos produtos primarios e por facilitar a súa comercialización. O noso obxectivo é que as persoas produtoras obteñan o máximo beneficio, e que a actividade agraria, a súa transformación e comercialización sexan un elemento de xeración de emprego e dinamización económica, que tanta falta fan”.
Dentro das medidas que o BNG propón para o comercio local está incentivar a compra de produtos locais e galegos, con promoción da etiquetaxe en lingua galega. Opoñerse á instalación de grandes superficies comerciais. Recuperar os mercados municipais e as zonas comerciais tradicionais.
Promover a produción alternativa e ecolóxica. Impulsar unha marca de calidade dos produtos da horta galega. Regular os horarios comerciais.
Establecer liñas de crédito prioritarias para o comercio de proximidade.
Promover axudas para implantar ou mellorar establecementos que comercialicen produtos autóctonos.