Boqueixón, 10 de setembro do 2018 – O Concello de Boqueixón ten xa aberto o prazo de inscrición para as súas Escolas Culturais e Deportivas que inclúen unha ducia de actividades de todo tipo.
As Escolas de Boqueixón están dirixidas a público de tódalas idades. Entre as materias nas que se pode inscribir a veciñanza esta o teatro, Pintura, Inglés, Patinaxe, Judo ou Xadrez. Unha das novidades deste curso é o programa Madrugadores. Trátase dun novo servizo de conciliación da vida laboral e familiar, dirixido a escolares de Educación Infantil e Primaria. As sesións desenvolveranse nas instalacións do CPIP Antonio Orza Couto. O custo e horario concretaranse segundo o número de solicitudes rexistradas.
Apoio Educativo
A todo o dito hai que engadir o programa de apoio educativo. Está dirixido ao alumnado de Educación Infantil e Primaria cun rendemento escolar insuficiente e insatisfactorio. A finalidade das sesións e ofertar unha axuda pedagóxica extraordinaria co fin de reforzar aos nenos na adquisición e automatización de técnicas instrumentais de aprendizaxe como lectura, escritura e cálculo. As sesións desenvolveranse no CPIP Antonio Orza Couto e serán impartidas pola Ruth Gómez, mestra de Educación Especial e Doutora en Pedagoxía Terapéutica.
Inscricións
As inscricións nas Escolas Culturais e Deportivas do Concello de Boqueixón deberán formalizarse antes do 21 de setembro no Departamento de Cultura (cultura@boqueixon.com). As fichas de inscrición pódense descargar na web municipal.
Requírese un grupo mínimo de participantes para iniciar cada unha das actividades. Estas desenvolveranse entre os meses de outubro e xuño.
O custo das sesións varían entre os 10 euros mensuais, nos casos de Teatro, Patinaxe, Xadrez e Pintura (non inclúe o material); os 15 euros ao mes de Judo e a Ocioteca; os 25 € de Inglés I e do programa de Apoio Educativo, e os 40 euros mensuais de Inglés II (adultos).
Dende o Concello ofrécense distinto tipo de descontos para familias. Tamén se realizan rebaixas no prezo se unha mesma persoa se apunta nunha ou máis actividades das Escolas Culturais e Deportivas.