Brión, 19 de xuño do 2015 – O alcalde de Brión, José Luís García, inaugurou o venres unha mostra de pintura composta polas 36 obras doadas ao Concello de Brión polos artistas participantes no “X Encontro coa arte: lembrando a Manuel María”, celebrado en 2015. Unha selección de pinturas que poderá visitarse libremente na sala municipal de exposicións de Brión ata mediados de xullo.
O pintor Xosé Vázquez Castro, comisario desta exposición e do “XII Encontro coa arte, lembrando a Carlos Casares” agradeceu a colaboración do Concello de Brión nestes eventos culturais pois “hai que conservar a cultura, que é o que asenta un pobo. Sen cultura, medraremos na ignorancia”. Así mesmo, agradeceu aos artistas “a xenerosidade ao doar unhas obras que pasan a formar parte da pinacoteca do Concello de Brión, unha colección que xa pasa das cincocentas obras”.
Un punto no que coincidiu o coordinador dos Encontros e desta exposición, Alberto Álvarez, quen apuntou que “esas obras forman parte do patrimonio artístico que Brión atesoura, un legado do Concello de Brión aos seus veciños”. E é que, como asegurou Vázquez Castro, “doce anos dan para moito e configuramos unha familia de artista que, a principios de cada mes de xuño, converten a Brión no centro neurálxico para os artistas e os amantes das artes plásticas”.
Finalmente, o alcalde brionés foi o encargado de dar a benvida aos artistas participantes nos XII Encontros coa Arte e de inaugurar a exposición dos Encontros de 2015. Aos primeiros citoulles un artigo de Carlos Casares sobre a literatura e o oficio de escritor, para dicirlles que “estou convencido de que vós sodes eses mestres dos que falaba Casares. E dende aquí convido á veciñanza a que faga caso do que dicía o mestre ourensán e participe nas actividades que organizamos nestes Encontros coa Arte, que teña ese contacto convosco para aprender de todos vós”.
Os XI Encontros coa Arte celebráronse ao longo de toda a fin de semana en espazos como o Río Pego e a Carballeira de Santa Minia e marcados polas altas temperaturas, os pintores traballaron intensamente nas primeiras horas e resgardándose do sol a partir do mediodía.
O Domingo a cita foi na Carballeira de santa Minia da que este vídeo é unha pequena mostra