Brión, 22 de xaneiro do 2020 – O GES de Brión retirou nas últimas 48 horas ata catro árbores derrubadas polo vento en estradas do concello e do veciño de Ames.
Os refachos de vento dos últimos días, xunto coa borrasca Brendan da semana pasada, provocaron a caída de estas catro árbores nun intervalo de cinco horas.
A incidencia máis grave tivo lugar ás 18:40 horas do luns na estrada de Gándara a Bastavales, onde unha gran árbore caeu sobre o tendido eléctrico e mesmo afectou a parte dun muro da zona. Para a súa retirada foi precisa tamén a colaboración dos Bombeiros de Santa Comba. Previamente, ás 17:20 horas, retirouse outra gran árbore caída a carón da avenida de Santa Minia, á altura do parque municipal de Pedrouzos, e que impedía o acceso ás vivendas da zona.
Finalmente, durante primeiras horas da tarde recolléronse outras dúas árbores caídas na estrada de Vilanova a Vidaloiso (14:00 horas) e na entrada ao polígono industrial do Milladoiro (Ames) ás 15:30 horas.