Oroso, 10 de maio do 2019 – O Concello de Oroso celebra ata o domingo a XXIII Festa da Troita cunha previsión de asistencia de 30.000 persoas ata o núcleo de Sigüeiro.
No amplo programa deste ano da Festa da Troita hai espazo para as orquestras, os bailes, os espectáculos de maxia, obradoiros infantís e charangas. Todo comezará esta noite co festival Oroso en Vivo, no que actuarán as orquestras Panorama e Ibiza.
Como non podía ser doutra maneira, haberá tamén as tradicionais degustacións de troita, coa colaboración dos establecementos de hostalaría de Oroso, e o xantar popular do domingo 12 de maio, na carpa da alameda de Góis. O pregón correrá a cargo do reitor da USC, Antonio López.
“Cúmprense ademais dez anos desde que a nosa gran cita para a gastronomía e a diversión foi declarada Festa de Interese Turístico”, lembra o alcalde de Oroso, Manuel Mirás.
Haberá tamén os tradicionais campionatos de pesca e a actuación de Barafunda, un grupo de animación que representará a troita e ós pescadores polas rúas de Sigüeiro.