Compostela, 7 de abril do 2020 – O ensino medio atopa un aliado dixital na USC. na Universidade de Santiago, que pon ao seu servizo o campus virtual para distintas actividades.
O portal https://www.usc.gal/gl/encontros-virtuais achega información dos títulos de grao da Universidade ao alumnado preuniversitario, ao que ofrece a posibilidade de participar en obradoiros, videoconferencias, chats, concursos e retos científicos ligados á vida universitaria
Estes encontros virtuais permiten tamén amosar outra información de interese relativa a instalacións, equipamentos científicos e tecnolóxicos e demais servizos que a USC pon a disposición da comunidade universitaria en particular e do conxunto da sociedade, nun senso máis amplo.
Os estudantes interesados poden acceder libremente á bitácora virtual da Zona USC, concibida como unha canle de conexión na que as persoas usuarias atoparán, ademais da información dos títulos académicos, diverso material audiovisual complementario, a través do que poderán afondar de xeito didáctico no coñecemento do título ou títulos que resulten do seu interese, ademais de coñecer as posibilidades de I+D+i que abrangue cada itinerario ou opción formativa.
Un breve vídeo a cargo do reitor Antonio López sirve de saúdo de benvida á comunidade de participantes desta primeira edición dos encontros virtuais da USC, unha iniciativa a través da que a institución académica sortea as limitacións de mobilidade derivadas do estado de alarma decretado por mor do coronavirus e dá continuidade ás actividades de información ao estudantado universitario que desenvolve a través do programa ‘A Ponte entre o Ensino Medio e a USC’, que coordina Celso Rodríguez.
Interactividade
Unha vez dentro deste espazo virtual, cada usuario terá ao seu alcance a oportunidade de participar en obradoiros, videoconferencias específicas para cada título, chats, concursos, foros con estudantes universitarios e retos científicos deseñados para orientar a súa aterraxe universitaria. O estudantado preuniversitario poderá facer uso destas prestacións a demanda, en función das quendas horarias establecidas polos docentes de cada titulación que teñen encomendada a tarefa de interactuar e dar resposta ás cuestións e consultas formuladas polos usuarios interesados .
A grella de títulos de grao ofertados pola USC para o próximo curso académico segue unha organización temática arredor das grandes áreas de coñecemento: Enxeñaría e Arquitectura, Ciencias, Arte e Humanidades, Ciencias da Saúde e Ciencias Sociais e Xurídicas.