Compostela, 13 de abril do 2021 – O colectivo Composcleta anuncia mobilizacións contra o borrador da nova Ordenanza de Circulación do Concello de Santiago.
A Asociación Cívica Composcleta márcase como obxectivo paralizar a aprobación do borrador dunha ordenanza de circulación que limitaría e castigaría o uso da bicicleta como medio de transporte na cidade.
Composcleta lanzou o pasado venres unha campaña de recollida de sinaturas co obxectivo de paralizar o borrador proposto polo goberno local de Santiago. Ademais, A Asociación anunciou a convocatoria dunha “bici-manifestación” o día 17 de abril, coa que animan á veciñanza de Compostela a amosar o seu rexeitamento a unha ordenanza de circulación “claramente anti-bicicletas”.
Desde o colectivo explican que “cando a oposición levou a pleno a proposta de actualizar a ordenanza de circulación do concello, era co obxectivo principal de favorecer o uso de bicicletas na cidade. Todos os grupos votaron a favor desta proposta excepto o PSOE, quedando aprobada por maioría”. Composcleta considera que, lonxe de promover o uso da bicicleta como medio de transporte, o borrador da nova Ordenanza fai todo o contrario, pondo impedimentos ás persoas que empregan a bicicleta, e amosando unha vontade sancionadora sen sentido.
Prohibición na zona vella
Entre as normas que o goberno local quere aprobar destaca a prohibición total de circular en bicicleta pola zona vella, as sancións por estacionar a bicicleta en calquera lugar que non estea habilitado ese fin, malia que a maioría de rúas da cidade non dispoñen deste servizo , ou a prohibición de circular por beirarrúas en calquera caso, mesmo para as crianzas, mentres que os patinetes eléctricos si poderían facelo en determinadas circunstancias.
A Asociación lamenta que o goberno local dea un paso atrás en mobilidade sostible cando a maioría de cidades europeas, incluíndo A Coruña e Vigo, están apostando polo uso da bicicleta. Por iso, Composcleta reclama que o goberno local recapacite e paralice o borrador desta ordenanza e solicita a elaboración dun novo documento que promova o uso da bicicleta e que “transforme as rúas de Compostela nun espazo inclusivo, sostible e accesible para todas as persoas”.
A “bici-manifestación” sairá da Alameda o sábado 17 de abril ás 12 da mañá, e percorrerá as rúas do centro, San Roque, Basquiños e Xoán XXIII, para rematar na praza do Obradoiro.