Compostela, 9 de maio do 2019 – Desde mañá, e ata o domingo, Santiago acolle, por segundo ano consecutivo, unha proba do Campionato do Mundo de Enduro.
Máis de cen pilotos competirán nos circuítos habilitados nno parque da Sionlla e na contorna do estadio Verónica Boquete (antes de San Lázaro). A presentación do Campionato de Enduro correu a cargo da concelleira Noa Morales; o edil de Medio Rural, Rafael Peña; o secretario xeral para o Deporte, José Ramón Lete; o presidente da Federación Galega de Motociclismo, José Candá; o director de Carreira, Pedro Mariano; e o piloto e inspector da Federación Internacional de Motociclismo Maurizio Micheluz.
A competición ábrese, o venres a carón do Estadio Verónica Boquete de San Lázaro, co Super Test e co Xtreme Test. Son probas curtas que permiten achegar a todo o público, incluso o non experto, á espectacularidade desta disciplina. Xa o sábado e o domingo celebrarase o rally, no que os/as participantes realizarán dúas voltas e media ao percorrido disposto no parque empresarial da Sionlla. Tamén se realizarán dúas especiais cronometradas, o Cross Test e o Enduro Test, que serán determinantes tamén para a clasificación final.
O Gran Premio de España do FIM Maxxis Enduro World Championship está organizado polo Moto Club Movete na Moto coa colaboración das federacións internacional, española e galega de Motociclismo.