Compostela, 29 de abril do 2020 – A Xunta de Galicia e a asociación Escena Galega acordaron aprazar a celebración da oitava edición do mercado Galicia Escena PRO, que se ía celebrar este mes de xuño en Santiago de Compostela.
Galicia Escena Pro e Xunta traballarán na procura de datas alternativas que permitan a súa celebración coas garantías sanitarias que determinen as autoridades correspondentes unha vez se levante o actual estado de alarma.
Ambas entidades deseñarán ademais un formato de feira flexible que facilite a súa adaptación á evolución da crise sanitaria polo Covid-19 nos próximos meses. Tratarase de incidir no papel profesional de Galicia Escena PRO como espazo de diálogo e intercambio entre os ámbitos da produción, a distribución e a programación de teatro e danza.
En 2019, o mercado galego das artes escénicas reuniu en Santiago a máis de 150 axentes culturais chegados de diferentes puntos de Galicia e do resto do Estado para asistir ao seu programa de exhibición e participar nas actividades de encontro profesional. Entre elas, reforzouse espacialmente o apartado de networking coa coordinación directa de máis de 120 reunións personalizadas entre os programadores de teatros, auditorios e festivais convidados e os representantes de compañías e empresas distribuidoras de artes escénicas.