Compostela, 29 de agosto do 2019 – Dúas exposicións servirán para iniciar o programa de actividades da biblioteca Ánxel Casal do mes de setembro.
As mostras estarán ubicadas na planta baixa do edificio, organizada por FEAFES, e na sala de infantil sobre libros nos que o lector forma parte das historias.
Visibilizando as enfermidades mentais
A Federación de Asociacións de Familiares e Persoas con Enfermidade Mental de Galicia (FEAFES) é unha entidade sen ánimo de lucro, creada en 1995, que agrupa actualmente a 14 asociacións repartidas por toda a xeografía galega.
A mostra xurde a raíz dun proxecto que consistiu na elaboración dun disco musical con cancións compostas por persoas con trastornos mentais que contan a súa experiencia en primeira persoa. A raíz dese disco, un grupo de persoas usuarias de Saúde Mental FEAFES Galicia realizou unha serie de pinturas e debuxos para ilustrar o libreto do disco.
No vestíbulo da biblioteca exporanse estes debuxos desde o día 2 ata o 16.
Mira que cadro!
Mira que cadro! é unha mostra que invita ao lector a pensar sobre o que ve. Libros que ensinan a mirar e a pensar e que fan partícipes das historias que esconden. Libros que transforman en espectadores e espectadoras activas e fomentan a creatividade.
Na sala infantil, pode visitarse durante o horario de apertura da biblioteca ata o 30 de setembro desde o día 3.