Compostela, 30 de agosto do 2019 – O sindicatoComisións Obreiras ven de mostrar nun comunicado a súa preocupación pola reestruturación sufrida pola unidade de coidados paliativos do Complexo Hospitalario Universitario de Santiago, o CHUS.
CCOO considera qus os cambios prexudicarán a calidade da atención que reciben os enfermos. Explican que co traslado da unidade ao Hospital Gil Casares, que se realizará en setembro, haberá un único celador para atender o dobre de doentes. Ata o de agora, o servizo tiña un celador propio para esta unidade nas quendas de tarde e de noite, pero na nova localización xa non será así.
Hai menos dun ano, este servizo xa padeceu outra reestruturación que implicou a desaparición de catro postos de enfermaría e dous de técnicos de coidados auxiliares de enfermaría (TCAE). Agora, os cambios aféctanlles aos celadores, que serán recolocados noutras unidades do CHUS.
Comisións ven reclamando nos últimos anos o incremento de celadoras e celadores xa que a día de hoxe hai unidades que en determinadas quendas só dispoñen dunha persoa pese a ter cargas de traballo moi elevadas.
A sección sindical de CCOO no CHUS coida que a Xerencia non debería amortizar, como pretende, seis prazas de celadores e celadoras, senón reforzar as unidades que máis o necesitan.