Compostela, 27 de agosto do 2020 – A concelleira de Educación de Compostela, Noa Díaz, explicou en rolda de prensa as obras acometidas nos colexios públicos da cidade.
Santiago actuou en 3 escolas rurais, 6 infantís e en 13 colexios de primaria cun investimento total de 244.302,82 euros. Os traballos centráronse en arranxos e hixienización. Este ano o parón polo confinamento facilitou que desde o mes de abril se puideran recoller datos das necesidades dos centros. A día de hoxe a práctica totalidade de estes arranxos están rematados.
O Concello de Santiago responsabilízase da conservación, reparación e mantemento dos colexios públicos de educación infantil e primaria. As competencias obrigatorias municipais refírense a 23 centros educativos, dos que 3 son escolas rurais, 13 son centros de educación infantil e primaria de carácter público, 6 escolas infantís municipais e 1 escola municipal de música.
Incerteza ante o inicio do curso
Noa Díaz fixo fincapé na interlocución fluída que se mantén cos centros. O 22 de xullo tivo lugar a última xuntanza cos directores que mostraron as súas inquedanzas sobre como se desenvolverán o programa madrugadores, os comedores ou que protocolos se seguirán no inicio do curso escolar.
Preguntada pola posibilidade de que o inicio se retrase a concelleira cre que si os protocolos se coñecen 3 días antes, como avanzou o Presidente da Xunta, si pode ser precipitado comezar o día 10
