Compostela, 1 de xullo do 2020 – O colectivo Stop Desahucios Compostela convoca hoxe mércores unha concentración para protestar polas comisións de Abanca.
A cita de Stop Desahucios será as doce e media na na Oficina Principal de ABANCA, situada na Rúa de Monteros Ríos, Nº 7 (Praza de Galicia).
Tal e como explica o colectivo a partires do 1 de xuño deste ano, ABANCA cobrou á clientela “comisións totalmente abusivas”. Na conta denominada “0 Comisiones” (e no resto de contas) están a cobrar 50€ semestrais en conceptos de mantemento e de administración.
Stop Desahucios denuncia que estas comisións aplícanselle as contas das persoas máis humildes que son as que non cumpren os “requisitos” impostos unilateralmente desde o banco (Ter un saldo determinado na conta, facer pagos coa tarxeta polo menos de 2000€, determinadas domiciliacións,…). A consecuencia, engaden, e que a debandita comisión de 100€ anuais, por ter una conta aberta “váiselle cobrar a pensionistas, xente en ERTE, desempregadas…”.
A situación agrávase en moitas localidades do rural galego onde só hai oficinas de Abanca o que supón unha gran indefensión para a xente que vive alí, que non pode elixir outra entidade, aparte de que “xustamente no rural galego a poboación é máis envellecida e fai un menor uso de tarxetas, banca electrónica, e outros produtos bancarios, polo que son vítimas potenciais destas comisións abusivas”.
Lembran tamén o esforzo que supuxo no seu momento o rescate da caixa galega “9.000 millóns de euros que saíron dos nosos petos, e seguen esixíndonos máis contribucións económicas”.
Concentración
Stop Desahucios indica que os obxectivos da Concentración son
“1. Mostrar o descontento xeneralizado co cobro destas comisións das nosas contas correntes.
- Recuperar os cartos que nos están a sustraer de xeito fraudulento.
- Chamar a atención da necesidade dunha banca pública, transparente e democrática.
Para cumprir estes obxectivos non cesaremos nas nosas actividades, organizándonos e utilizando todos os medios legais posibles para facer xustiza diante dun feito que consideramos inmerecido e cruel.”