Compostela, 9 de outubro do 2019 – A inauguración do Encontro Internacional de Reitores no Camiño de Santiago reunirá máis de 32 representantes institucionais dos órganos de goberno de 25 universidades.
O Encontro de Reitores comezará ás 15.30 horas. Na cerimonia de inauguración participarán o conselleiro de Cultura e Turismo, Román Rodríguez; o presidente do Grupo Compostela de Universidades, Marek Kręglewski; e o reitor da USC, Antonio Díaz.
Este Encontro Internacional de Reitores no Camiño de Santiago está organizado polo Grupo Compostela de Universidades en colaboración coa Consellaría de Cultura e Turismo da Xunta de Galicia. O programa do evento inclúe na súa parte académica actividades como mesas redondas, grupos de traballo e relatorios de expertos como a xefa da Unidade de Educación Superior da Unión Europea, Vanessa Debiais-Sainton, ou o director xeral da Oficina da Alto Comisionado para a Axenda 2030, Federico Buyolo.
A cita completarase con visitas culturais e académicas á cidade da Coruña, degustacións de produtos galegos e un percorrido polo Camiño de Inverno na contorna da Ribeira Sacra. Na súa derradeira xornada, o venres 11, asinarase en Chantada a Declaración Solemne Ribeira Sacra de Reitores no Camiño de Santiago, expresión do compromiso das universidades e da súa vontade de traballar en prol do logro dos obxectivos de desenvolvemento sostible na Educación Superior e da iniciativa de universidade europea.