Festival Ateneo Barroco 2019

1

Compostela, 4 de setembro do 2019 – O Ateneo de Santiago da un paso máis nas súas actividades coa creación do Festival Ateneo Barroco que se celebrará no mes de outubro.

O Festival Ateneo Barroco forma parte do programa O teu Xacobeo, impulsado pola Xunta de Galicia, e conta co patrocinio da Deputación da Coruña e o Concello de Santiago e a colaboración da Universidade de Santiago. A programación reúne unha proposta de concertos e actividades complementarias didácticas e divulgativas (conferencias, encontros, proxeccións, etc.) que se celebrará na cidade nos primeiros días do vindeiro mes de outubro.

No acto de presentación interviñeron o Secretario da entidade organizadora Francisco Candela e o Director artístico do Festival Víctor Carou, así como a Comisaria do Xacobeo 2021 Cecilia Pereira e a responsable de Acción Cultural do Concello de Santiago Mercedes Rosón.

Na programación desta nova actividade cultural para Santiago de Compostela destaca a celebración de 5 concertos entre o 8 e o 12 de outubro ás 20.00 horas con pezas de Bach, Haendel, Vivaldi ou Barbara Strozzi, interpretadas por artistas da altura de Massimo Sapadano e Fernando López Pan, Marta Infante e Manuel Vilas, así como os grupos Resonet, Gli Incogniti e Accademia del Piacere, onde se poderá gozar da música e do patrimonio artístico da cidade, en teatros, igrexas e espazos singulares como o Teatro Principal ou a Igrexa e o Paraninfo da Universidade. Estes concertos irán precedidos de pequenas charlas impartidas polos propios intérpretes que versarán sobre os instrumentos do barroco (clave, arpa de dúas ordes, tiorba e viola da gamba).

O Festival Ateneo Barroco quere amosar dende a esta primeira edición a súa vocación de plataforma de mostra, de intercambio e de diálogo dos artistas e intérpretes galegos e residentes en Galicia, recoñecidos especialistas que teñen centrado os seus esforzos formativos e a súa traxectoria profesional e investigadora na música antiga, con prestixiosos artistas doutras latitudes que, sen dúbida, contribuirán a enriquecer a experiencia dos asistentes nun proxecto que nace con visos de continuidade, crecemento e expansión. Ademais, a igualdade é un dos obxectivos primordiais en todos os seus niveis, facendo promoción activa da participación de mulleres, creadoras, intérpretes, profesionais, comunicadoras e investigadoras dun xeito responsable, visible e protagonista.

Previamente, o Festival inaugurarase na Rúa do Vilar, 19, cun ciclo de documentais os días 1 e 2 de outubro e unha conferencia titulada “Barbara Strozzi, a voz misteriosa”, impartida por Stefano Russomanno, o luns 7 de outubro ás 20h.

As entradas para os concertos sairán á venda a partir do vindeiro xoves día 5 de setembro, a través de Ataquilla así como na sede do Ateneo de Santiago e nas sedes de Afundación da Coruña, Santiago, Vigo e Ourense. O acceso ás charlas así como ao ciclo de documentais e á conferencia inaugural será gratuíto con limitación de capacidade. O programa completo pódese consultar na páxina https://festivalateneobarroco.gal.

Share.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial