A Universidade prepara o curso 2020 – 2021

0

Compostela, 20 de maio do 2020 – A Universidade de Santiago traballa nun plan de actuación que servirá de folla de ruta para o próximo curso 2020 – 2021.

Unha vez rematada a docencia do segundo cuadrimestre e aprobados os sistemas de avaliación de acordo coa situación de non presencialidade por mor da COVID-19, a USC traballa para que o vindeiro curso poida desenvolverse en condicións axeitadas a docencia, facendo fronte de xeito eficaz a posibles eventualidades como as experimentadas nas últimas semanas.

O grupo que prepara o documento ten tamén a tarefa de avanzar nas bases doutro plan a medio prazo que permita profundar nas distintas modalidades docentes que ofreza a USC sen perder a esencia dunha universidade presencial.

Curso nun contexto complexo

A situación das últimas semanas deixa constancia “da nosa capacidade de adaptación e de resposta a contextos complexos” e representa, en palabras do reitor Antonio López, “unha oportunidade para incorporar e apostar de xeito decidido por ferramentas e metodoloxías que enriquezan a nosa esencia como universidade presencial apoiándonos na capacidade que poden achegar as tecnoloxías nun escenario de docencia virtual”. Moitas das medidas e decisións adoptadas, “inéditas para un contexto imprevisible, teñen chegado para quedarse”.

A USC prepárase para o vindeiro curso

O Reitor Antonio López

O traballo da comisión, que comezou esta semana, avaliará as actuacións que se levaron a cabo no segundo cuadrimestre deste curso, tanto no relativo á docencia como no referido á avaliación. O seu obxectivo será avanzar nesta liña e reconsiderar as actuacións susceptibles de mellora, explicou o reitor. O traballo de análise prestará atención a catro bloques específicos de directrices xerais, atendendo especificamente a cuestións esenciais en materia de titulacións (emprego da docencia en remoto e ponderación da avaliación continua); calidade; organización académica; e sistema tecnolóxico.

Membros do grupo de traballo

A vicerreitora de Titulacións e Captación Internacional, María Xosé López Couso; o vicerreitor de Calidade, Jacobo Limeres Pose; a vicerreitora de Organización Académica, Celia Besteiro Rodríguez; e o vicerreitor de Planificación, Tecnoloxías e Sustentabilidade, Gumersindo Feijoo Costa, formarán parte do grupo de traballo responsable da elaboración do Plan. Xunto a eles, participarán ademais as persoas responsables do Centro de Tecnoloxías para a Aprendizaxe (CeTA) e da Área TIC da Universidade, dous especialistas en novas tecnoloxías aplicadas á educación, a persoa responsable da Área de E-learning e Colaboración do Centro de Supercomputación de Galicia (CESGA); así como un representante do Persoal Docente e Investigador por cada unha das cinco grandes áreas de coñecemento.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial