Investigando desde a casa coa Universidade, outros modos de pasar a corentena VI

Compostela, 8 de abril do 2020 – A Universidade segue ampliando os recursos en liña e agora propón investigar en Artes e Humanidades, tamén dende a casa.

Logo de elaborar listaxes no eido da Biomedicina e das Ciencias Sociais e Xurídicas, a Biblioteca da Universidade continúa realizando un percorrido polas diferentes áreas de coñecemento a fin de escolmar recursos en liña para favorecer a docencia en remoto do alumnado.

A plataforma de préstamo de libros electrónicos Prelo segue a ser, xunto co repositorio institucional Minerva, unha das principais fontes de información. No eido das Artes e Humanidades, o alumnado pode acceder a libros electrónicos sobre Arte e Cultura, Filosofía e Pensamento, Lingüística e Estudos Literarios e Literatura.

Recursos docentes, Traballos fin de Grao, Traballos fin de Master e Teses son algúns dos arquivos que poden ser consultados de forma completamente gratuíta en Minerva. Xunto a eles, tamén pode atoparse material do Fondo Histórico e Patrimonial da BUSC, do Instituto da Lingua Galega (ILGA) e do Servizo de Normalización Lingüística.

A USC alberga ademais no seu repositorio institucional as revistas que edita dentro das Artes e Humanidades. Deste xeito, Ágora : Papeles de Filosofía, Boletín Galego Literatura, Dorna. Expresión Poética Galega, Estudos de Lingüística Galega, Evohé : Revista Cultural do Campus de Lugo, Moenia, Revista Lucense de Lingüística e Literatura, Quintana : Revista do Departamento de Historia da Arte, Télos. Revista Iberoamericana de Estudios Utilitaristas e Verba. Anuario Galego de Filoloxía están accesibles de modo online e de balde para toda a comunidade universitaria, así como para persoas usuarias alleas á USC.

Outros recursos

A BUSC completou asemade a súa listaxe con ligazóns de acceso a bibliotecas dixitais, dicionarios, museos e bases de datos de imaxes, así como proxectos e centros de investigación.