Compostela, 4 de xuño do 2019 – Comisións Obreiras ven de denunciar novos desprendementos no teito do hospital Gil Casares e a súa mala conservación en xeral.
A sección sindical de CCOO explica que o desprendemento no Gil Casares veu provocado por unha filtración de auga e tivo como consecuencia a inundación dun corredor. O sindicato sinala que «por sorte» non houbo danos persoais, xa que o dito corredor está situado na planta -1, no lugar de acceso dos carros de cociña, unha zona por onde tamén é frecuente a presenza do persoal, xa que é onde se localizan os vestiarios.
Comisións destaca que «non se trata dun feito illado», pois sucesos parecidos tiveron lugar o ano pasado, nos meses e xuño e outubro. O sindicato critica a falta de implicación da Xerencia na conservación do
hospital e insta a investir no seu mantemento «se non queremos lamentar unha desgraza algún día». As humidades e as filtracións son unha constante no centro hospitalario, que actualmente conta con dúas unidades de hospitalización, radioloxía e as consultas externas de dermatoloxía.