Compostela, 24 de abril do 2018 – Este mércores 25 de abril a sección galega da SEEC (Sociedade Española de Estudos Clásicos) organiza na Facultade de Filoloxía os III LVDI COMPOSTELLANI, xornada que toma o seu nome das antigas festas romanas, ludi, na cal a cultura clásica será a protagonista.
A partir das 11.00 da mañá alumnado e profesorado de Filoloxía Clásica e Historia da USC, IES Arcebispo Xelmírez II (Compostela), IES Manuel García Barros (A Estrada), IES San Tomé de Freixeiro (Vigo) e IES de Melide realizarán obradoiros de gladiadores romanos, hoplitas gregos, moda clásica, cociña romana, escritura antiga, micro teatro clásico, grafitos de amor pompeianos, danza e xogos do mundo antigo para alumnado doutros centros. Ao mesmo tempo, de 11.00 a 13.00 terá lugar unha xincana mitolóxica na zona monumental compostelá, con saída da praza do Obradoiro. Os descansos amenizaranse con pequenos espectáculos de danza grega, teatro e unha Regueifa entre filósofos gregos e alemáns, a cargo do grupo de teatro Teiroa do IES de Melide.
A partir das 17.30 procederase á entrega de premios aos gañadores e gañadoras da IV Olimpíada de Tradución de Textos latinos e gregos, presidida pola Directora Xeral de Xuventude, Participación e Voluntariado, Cecilia Vázquez Suárez e autoridades académicas. Gran parte do alumnado e profesorado acudirá a esta cita caracterizado como gregos e romanos para, xunto co mobiliario de inspiración clásica fabricado polo Ciclo de Madeira do IES de Melide, transformar a Facultade de Filoloxía nun ágora grega ou nun foro romano.