Ames, 25 de maio do 2018 – O concello de Ames presentou, no Pazo da Peregrina, a primeira edición do Encontro de jazz do Concello. Unha iniciativa cultural que se desenvolverá nos exteriores do Pazo o próximo sábado, 9 de xuño, e na que actuarán os grupos locais, pero de sona internacional, Sumrrá e Pablo Castaño Quartet.
A presentación do Encontro de jazz correu a cargo do concelleiro de Educación e Cultura, David Santomil, de Pablo Castaño, membro do grupo Pablo Castaño Quartet, e de Xacobe Martínez, integrante do grupo Sumrrá. O obxectivo do Concello de Ames é ir consolidando e fortalecendo este evento, así como ampliar a organización de outras actividades relacionadas co jazz, para tratar de poñer en valor esta disciplina musical, tendo en conta a calidade artística que existe en Ames. O concerto está dentro da programación de Cultura no Camiño, unha serie de eventos vinculados as rutas xacobeas e impulsados desde a AGADIC.
Xacobe Martínez, integrante do grupo Sumrrá, explicou que “sempre que nace unha nova iniciativa deste tipo para poder achegar a nosa música ao público é fantástico. Nós, ademais, que somos veciños de Ames fainos especial ilusión actuar aquí. Ao mesmo tempo é unha responsabilidade para nós porque é o primeiro Encontro de jazz que se fai en Ames, pero estamos encantados de que dende o Concello entenderan que é necesario un evento deste tipo. Creo que vai ser unha noite máxica no Pazo da Peregrina porque ten un recollemento ideal e unha acústica moi boa. Danse todas as circunstancias para que sexa unha gran noite de jazz”.
Sumrrá é un trío de Jazz galego, formado en 2000 por Manuel Gutiérrez ao piano, Xacobe Martínez Antelo ao contrabaixo, e LAR Legido á batería. En 2014 recibiu o Premio Martín Códax da Música na categoría de jazz / músicas improvisadas. No concerto que ofrecerán Ames presentarán o seu último disco e segundo dixo o propio Xacobe Martínez “é unha boa oportunidade para escoitar a música que nós facemos”.
Por outra banda, Pablo Castaño, membro do grupo Pablo Castaño Quartet, incidiu en que “Ames ten un gran potencial a nivel musical. Aquí no noso concello hai unha gran cantidade de músicos. Este evento servirá para que a veciñanza se achegue ao jazz e a músicos locais que viven neste concello. Estou dobremente contento por tocar en Ames e porque estou presentando o meu primeiro CD e vou poder facelo aquí. A presentación será o día 2 de xuño no Teatro Colón, na Coruña, e de seguido xa chegaremos a Ames para presentalo aquí tamén. Vai ser unha noite máxica xa que o Pazo da Peregrina vai a estar especialmente iluminado para este Encontro de jazz que seguramente será un éxito”. O cuarteto de Pablo Castaño está composto por saxofón, piano, contrabaixo e batería.
