A Estrada, 3 de xullo do 2018 – O Bloque Nacionalista Galego ven de denunciar os problemas de limpeza que sofren os pavillóns polideportivos municipais.
O BNG lembra que o pasado mes de xuño fíxose un rogo no pleno sobre a necesidade de reforzar o servizo de limpeza nos pavillóns. Os nacionalistas explican que “na pasada fin de semana comprobamos unha vez máis que esa petición non foi atendida, e os usuarios e usuarias, non só padeceron as consecuencias, senón que tiveron que asumir tarefas que non lle corresponden. Durante o Campionato Galego de Ximnasia de Trampolín, no que participaron clubs de todo o país, houbo días (concretamente o domingo) que, ao chegar pola mañá os participantes atopáronse co pavillón cheo de lixo (bolsas, latas, …) ciscado por todas partes, dando unha imaxe penosa e vergoñenta do noso concello. Foron os propios participantes do campionato os que tiveron que asumir as tarefas de limpeza que ten que coordinar ao goberno municipal do PP”.
Desde o grupo municipal do BNG demandan que o goberno asuma as súas responsabilidades e reforce a limpeza dos pavillóns cando sexa necesario.