Ames, 28 de xuño do 2017 – A Deputación da Coruña destinará 20.000 euros para financiar a adquisición dunha nova furgoneta destinada a efectuar o reparto dos comedores escolares dos colexios do Concello de Ames.
A achega provincial, que será articulada a través dun convenio de colaboración entre ambas institucións, será sometida á aprobación da corporación provincial no pleno ordinario do venres 30 de xuño e supón un 80% do orzamento total da adquisición do vehículo. O 20% restante (5.000 euros) será achegado polo Concello de Ames.
A furgoneta estará destinada a dar servizo á rede de comedores escolares de Ames, da que se benefician máis de 1.100 alumnos de infantil e primaria do municipio nos centros de A Maía, Barouta, Vertín, Milladoiro e Agro do Muíño.
Precisamente no CEIP Agro do Muíño, onde se sitúan os comedores escolares qiue preparan as comidas para este centro e para outros do municipio, o presidente da Deputación, Valentín González Formoso, coñeceu de primeira man a principios deste ano o funcionamento deste servizo xestionado directamente polo Concello e comprometeu o apoio económico da institución provincial para renovar o vehículo que presta actualmente o servizo de reparto dos menús entre os centros.
O novo vehículo contará cunha zona útil de carga de 5 metros cúbicos e un máximo de 1.000 kg, 100 cv. de potencia, capacidade para tres persoas e zona de cargo con panel separador e un ancho máximo de 2,35 metros para poder acceder sen problemas ás dependencias de cociña do Agro do Muíño, dende onde distribuirá os menús a outros colexios amienses.