Bisbarra, 3 de xuño do 2020 – A Deputación da Coruña comezou as obras de renovación da capa de rodaxe da estrada provincial DP 1002 da AC-234 á Gandara, no termo municipal de Boimorto, cun investimento de 72.849,54 euros.
A estrada de Boimorto, cuxo firme actual está deteriorado, ten un tráfico medio de 1.897 vehículos diarios, dos que algo máis do 7% son vehículos pesados. As obras suporán a renovación completa da capa de rodaxe do vial no tramo que vai desde o PQ 0+000 ao 0+900, tras o fresado e reparación das zonas máis deterioradas.
O saneo da capa superficial levarase a cabo nunha superficie de 2.732 metros cadrados, mentres que a dotación da nova capa de mestura bituminosa en quente de 5 cm de espesor farase nunha zona de 7.280 metros cadrados.
As obras teñen un prazo de execución de dous meses e inclúen tamén o reforzo da sinalización horizontal e vertical na zona.