Compostela, 8 de maio do 2019 – Dios ke te Crew presenta este sábado 11 na Capitol ‘O Ciclo da Serpe’, o seu novo e agardado disco, a cita as nove da noite.
Dios ke te Crew regresa despois de 8 anos cun LP cargado de simbolismo que mantén o seu particular humor apegado á actualidade e cargado de aceda retranca, ironía e sátira.
Neste novo traballo continúa a tradicional vontade da banda de Ordes de intervención social, con temas dedicados á liberdade de expresión, á ultradereita, ás redes sociais ou á xestión do lixo, entre outros
‘O Ciclo da Serpe’ é un LP cargado de simbolismo e un traballo sisudo que amosa a madurez dunha banda que regresa logo de varios anos nos que se centraron en proxectos individuais.
O Ciclo da Serpe ten un claro compoñente conceptual, tanto o propio título como todo o coidadoso traballo de arte do formato físico, coas ilustracións da artista Lidia Cao e con deseño e dirección de arte de Sokram (artista visual e vocalista membro do grupo). Na portada podemos contemplar un uróboros (serpe que engule a súa propia cola) a medio camiño entre animal e máquina, que entra e sae dun dodecaedro de pedra no que parece estar enredada. Un título e unha imaxe con complexos simbolismos dos que se poden arrincar distintas lecturas.
Os uróboros, presente en culturas antigas tan dispares como a exipcia, a grega, a china, ou a celta, entre outras, representa a natureza cíclica das cousas, que comezan de novo unha vez rematan, a perpetuidade, o eterno retorno e, nun sentido máis amplo, a paso infinito do tempo, o infinito devir. Eventos cíclicos como o día e a noite, a vida e a morte, o transcurso das estacións ou, na música, o eterno loop que se repite unha e outra vez…, mesmo quizais o propio retorno da formación DKTC.
O Ciclo da Serpe tamén alude á muda de pel, a ese cambio necesario que todo individuo ou sociedade está condenado a realizar nalgún momento da súa existencia para poder continuar… E do mesmo xeito, tamén parece conter unha crítica implícita ao sistema capitalista, encarnado no corpo da serpe e, por definición, condenado a devorarse a si mesmo.
Este disco foi gravado e mesturado en Rapapoulo Estudio (Ordes) e masterizado en Jammin Masters (Berlín). Nel colaboran o actor Miguel de Lira en dous sketches; Alto Asalto e Hermano L nas voces; ademais de músicos como Manu Paino, Serxio García, Xosé Antonio Ríos, Martiño D. Mato, Inés MIrás ou Javier Pardiñas. A portada ten unha animación en realidade aumentada realizada polo artista audiovisual A.L. Crego.