Ames, 5 de outubro do 2018 – O PP chegou a Ames nun xesto que abalou a unidade acadada no concello e a puxo como primeira pedra da campaña das eleccións municipais.
No acto que tivo lugar na Casa da Cultura do Milladoiro falouse da importancia da unidade e púxose como valor fronte ao resto de partidos. Chegouse a dicir que só o Partido Popular era capaz de reunir nun só espazo a tantos alcaldes xa que o resto de formacións non son capaces de que se senten a mesa.
O certo é que o PP comeza a campaña cara as Eleccións 2019 cos deberes feitos e, se non cambia, cunha idea clara do que quere transmitir. Non é só Ames, Padrón integrou ao Partido Galeguista e o partido ten as portas abertas para que Terra Galega faga o mesmo en Santa Comba. A sensación que queda e que o partido busca afianzar o que ten e recuperar as bases, máis alá de que se consiga alcanzar alcaldías; como todos son conscientes de que as maiorías absolutas custan cada vez máis.
Diego Calvo cos candidatos as alcaldías nas Eleccións 2019
Festa pero non tanta
O acto foi moi sinxelo, nada que ver con outras épocas. Evaristo Ben, vicesecretario xeral de Organización e Territorio e director de campaña para as municipais, foi presentado aos candidatos que, tras dicir unhas palabras, sentaban nunha das esquinas do escenario. Por orden alfabético, aínda que deixando aos anfitrións para o final, pasaron o actual alcalde de A Baña, Andrés García; María Fariña anova candidata de Brión que dixo atopar a motivación no feito de que fai pouco foi nai; Manuel Fernández de Boqueixón; o alcalde de Dodro, Valentín Alfonsín, que ademáis de presumir de ter un dron no concello dixo que “na oposición pásase moito frío pero apréndese moito”; Rubén Suárez que será o candidato en Negreira e que agradeceu ao actual portavoz na vila, Juan Rey, a xenerosidade para completar o relevo; Juan Angueira alcalde de Padrón, que agradeceu ao Partido Galeguista a integración e o traballo; Ramón Tojo de Rois, que lembrou a necesidade de traballar en conxunto para conseguir a Deputación; María Pose, actual alcaldesa de Santa Comba; Agustín Hernández de Santiago quen dixo que situación de cara aos comicios é moito mellor que hai catro anos; José Manuel Guerra de Teo que falo en clave moi local, criticando duramente o que se fai na súa vila e chegando a dicir ” deixan sen cartos as nosas asociacións e van todos para Chevere”; José Manuel Varela que será o candidato en Val do Dubra, que dixo que naceu alí, criouse alí e traballa alí e que por iso quere ser alcalde; Carlos Martínez Carrillo de Vedra que subiu a aposta e dixo que conseguirían algo nunca visto en Vedra, en corenta anos de democracia nunca se repetiu unha maioría absoluta e o ían a facer; e finalmente Ramón García Argibay de Ames.
Ramón García foi recibido con gritos de “alcalde, alcalde”. O seu primeiro recordo foi para Alfonso Rey, concelleiro falecido que vivira ao seu carón a creación de Pacto x Ames e que sempre quixo volver ao Partido Popular cando se deran as circunstancias precisas. O seguinte foi agradecer a xenerosidade de Oliva Agra, algo feito en varias ocasións ao longo do acto polos que ían intervindo. Finalmente Argibay dixo que ia ser complicado porque diante tiñan xente sen valores aos que non lles importaba nada.
Ramón García cos candidatos as alcaldías nas Eleccións 2019
Pechou o acto Diego Calvo, secretario provincial quen dixo que sobre todo os candidatos que alí estaban eran boas persoas. Falou novamente de unidade e animou a todos de cara aos próximos 8 meses.
Un acto que pon en marcha a maquinaria electoral do PP na bisbarra e deixa un pouco na sombra ao resto dos partidos, veremos quen é o seguinte en moverse.
