Eleccións, 11 de maio do 2019 – A campaña electoral quedou embazada pola morte de Alfredo Pérez Rubalcaba. Os actos de tódolos partidos, excepto Vox, foron cancelados este venres e o Psoe ampliou esa cancelación ata este serán despois do enterro do político.
Santiago
Na campaña o BNG, con Goretti Sanmartin á cabeza, presentou un programa destinado a mellorar a calidade de vida e que parte das propostas da veciñanza. “É un programa completo que toca ámbitos como emprego e ensino, cultura, lingua e memoria histórica, mobilidade e seguranza viaria, xestión do rural, ambiental, transparencia, cun foco especial en políticas de igualdade e feminismo, un novo modelo de turismo, entre outros”, explicou a integrante da lista Navia Rivas.
Compostela Aberta pola súa banda presentou o primeiro dos “trece retos para gañar máis futuro para Santiago”, nos que Compostela Aberta resume o seu programa electoral. Martiño Noriega, candidato, e Xan Duro, número 7 da lista, explicaron a intención de remunicipalizar o servizo da auga “porque a xestión directa é máis eficiente, transparente e sostible, e porque este é un ben fundamental das persoas, un dereito que non debera estar sometido ás regras do mercado”.
Polo Partido Popular Agustín Hernández segue presentando cláusulas do seu “contrato coa cidade” e en este caso promete 7 novas áreas de aparcamentos disuasorios. Hernández explicou que a proposta Popular ofrecerían algo máis de 600 prazas, o que equivalería a case duplicar a oferta que na actualidade é de 800 prazas. Serían dúas en Fontiñas, outras dúas na contorna de Sar, dúas máis entre Pontepedriña e Conxo e unha sétima a medio camiño entre a área de Santa Marta e o da Avenida de Ferrol.
Finalmente o Psoe de Xosé Sánchez Bugallo presentou as medidas sobre mobilidade incluídas no programa electoral. Son 27, agrupadas baixo o epígrafe “A cidade a
escala humana”, e divididas en 3 eixos: a priorización do uso peonil, a incorporación progresiva da bicicleta, e o transporte urbano. Máis en concreto, destacou “a necesidade urxente de licitar un novo contrato de transporte urbano, o actual está xa vencido, para que entre en vigor no ano 2021”; e a creación dun Consorcio Metropolitano de transportes para a conexión dos núcleos rurais que non se poidan integrar no transporte urbano.
Axenda
BNG
Goretti Sanmartín participa as doce do mediodía nun acto en Compostela baixo o título “40 anos de nacionalismo no concello de Santiago” no que intervirán concelleiros das corporacións desde 1979 ata hoxe en día.
Compostela Aberta
Martiño Noriega, Xan Duro e Concha Fernandez estarán as oito da tarde en Laraño e as nove e cuarto en Figueiras. Pola súa banda Marta Lois, Rafa Peña e Jorge Duarte estarán as oito da tarde en Marantes e as nove e cuarto en Nemenzo.
PP
Non temos previsións polo momento, se incorporarán en canto cheguen
Psoe
O partido socialista como xa dixemos suspendeu os actos. O Luns Sánchez Bugallo participará en dous debates ao longo da xornada.
Bisbarra
Seguen as presentacións de candidaturas na campaña da bisbarra e unha das últimas foi a de Unión x Ordes. A discoteca LP45 acolleu a presentación de todos e cada un dos candidatos da renovada lista. Manuel Iglesias, actual concelleiro e número 3 da candidatura, e a profesora Alba Regos como coordinadora de campaña e número 2, explicaron de forma máis pormenorizada o programa de goberno que Unión por Ordes presenta para 2019-2023. Cerrou o acto Manuel Regos agradecendo a todos e cada un dos membros que formaron Unión por Ordes dende o seu inicio. Regos agradecía de forma especial a súa familia e ós 26 compañeiros e compañeiras que o acompañaban na candidatura.
O Psoe de Val do Dubra tamén fixo a súa presentación e o candidato Diego Luis Díaz falou dun “equipo renovado, unido, de xente ilusionada e preparada para facer posible o cambio que Val do Dubra precisa”. Xunto a el estiveron a deputada Pilar Cancela, o portavoz do PSdeG no Parlamento de Galicia, Xaquín Fernández Leiceaga e o secretario xeral de Xuventudes Socialistas, Aitor Bouza.
No primeiro encontro coa veciñanza o candidato do Partido Popular de Teo, José Manuel Guerra, anunciou a posta en marcha dun Pacto pola Paisaxe que sexa capaz de poñer en valor as zonas verdes coas que conta o municipio como a zona da Burga-Xirimbao. O seu plan de sendeiros verdes incluirá importantes actuacións en Montouto-Cacheiras e Calo, no Río Tinto.
O BNG de Ames presentou o #ProgramaEnMarcha. O candidato e actual concelleiro de Educación e Cultura David Santomil e compoñentes da súa lista subíronse ao autobús no núcleo urbán de Bertamiráns realizando o traxecto ata O Milladoiro para reivindicar a ampliación desta ruta. O do BNG reivindica un transporte público con máis frecuencias e mellores horarios, recuperando o noitebús, incidindo en novas rutas para o rural, e esixindo á Xunta un plan de transporte metropolitano para Ames.
