Negreira, 5 de marzo do 2019 – O alcalde de Negreira, Jorge Tuñas, lamentou á utilización “partidista e electoral” do delegado da Xunta nun acto para presentar un proxecto de Agader.
O alcalde transmitiu o seu malestar ao non ser convidado á visita que o delegado territorial da Xunta, Ovidio Rodeiro, realizou ao municipio. O delegado achegouse ao concello para visitar un hotel subvencionado pola Axencia Galega de Desenvolvemento Rural (Agader). En lugar de convidar ao rexedor, Rodeiro visitou o lugar acompañado polo candidato do Partido Popular de Negreira, Rubén Suárez e outras persoas afíns a tal formación política.
O rexedor, Tuñas Caamaño, explica que “o candidato do PP non ten ningunha vinculación coa administración local. O mínimo que hai que ter é respecto institucional, lle guste ou non lle guste son eu o alcalde do pobo. Que non cometan a desfachatez de chamar a alguén que non ten que ver coa institución local. Non se pode facer campaña con isto”.
O alcalde xa puxo en coñecemento da Delegación Territorial o seu descontento con respecto a esta situación que, ademais, xa ocorrera con anterioridade. En concreto, o rexedor referiuse a unha inauguración dun curso do 112 destinado ás agrupacións de Protección Civil onde tamén se contou coa presenza do candidato do Partido Popular.
“Sabemos que o único que queren é promocionar o seu candidato á alcaldía, pasando por alto os principios de respeto institucional que deben manterse entre as administracións. Os veciños e veciñas de Negreira merecen respeto igual que a cidadanía doutros concellos. E quen os representa é o alcalde do Concello, sexa do partido que sexa” explicou o primeiro edil.