EntroidON en Teo como alternativa á rúa

Teo, 26 de xaneiro do 2021 – O concello de Teo propón un EntroidON como alternativa a unha das celebracións máis tradicionais e que se verá afectada de xeito directo pola pandemia.

A Concellaría de Cultura de Teo preparou unha alternativa que se adapte as novas restricións e á situación xeral que viven celebracións como esta. Este EntroidON contará coa colaboración da Asociación Cultural O Pozo da Xerpa de Rarís, Asociación Cultural o Demo de Reis e Asociación Cultural de Festexos O Carme de Teo.

Xenerais nas redes

O proxecto colaborativo consistirá en celebrar o Entroido Tradicional dos Xenerais da Ulla nas datas propias de celebración do Entroido das propias parroquias pero en versión dixital e a través das redes sociais.

O termo EntroidON, explican desde o concello “expresa que queremos manter o Entroido vivo, aceso, con dinamismo, e en movemento, baixo a idea de seguir conservando as datas particulares e as tradicións culturais”.

Visibilidade aos Xenerais da Ulla

As asociacións participantes mostrarán nas redes fotos e vídeos do Entroido 2021 feitas dende as casas das persoas integrantes. haberá espazo para manter os tradicionais atranques ou altos que serán gravados previamente, sen público e coas medidas pertinentes e que serán publicados nas redes sociais para visualizar nos días e hora de costume segundo manda a tradición.

SONY DSC

A través do EntroidON farase tamén unha pequena homenaxe ás entidades e persoas colaboradoras que dende as distintas parroquias, entidades e colectivos de Teo colaboran de xeito altruista na conservación e posta en marcha dos Entroidos Tradicionais dos Xenerais da Ulla.