Ames, 24 de novembro do 2017 – Nunha nota conxunta os portavoces de Pacto x Ames e do PP de Ames xunto co concelleiro non adscrito Javier López esixen a retirada da publicación 94Km por considerala partidista.
Na nota os firmantes consideran que “O tripartito incrementa a súa maquinaria propagandística a costa dos contribuíntes editando un “periódico oficial” que reflicte o pensamento único e o autoritarismo do alcalde menos votado da historia de Ames”.
Ramón Argibay de Pacto x Ames explica que consideran a publicación “unha iniciativa sectaria que non recoñece a vontade democrática deste goberno municipal ao recoller unicamente as vondades dun goberno que adolece de transparencia e respecto democrático”.
Pola súa banda, Oliva Agra, Portavoz do Grupo Municipal do Partido Popular de Ames, destacou que a publicación só demostra a tiranía e a forma autoritaria de gobernar deste executivo –constituído por PSdeG, BNG e Contigo Pódese- que desprezan o traballo desenvolto polos partidos da oposición, “esenciais en todo sistema democrático” e por tanto, minusvaloran a opinión dos amienses que co seu voto, outorgaron o seu apoio ás opcións políticas que se atopan na oposición.
Javier López, concelleiro non adscrito, destacou que con esta publicación “estase a faltar ao respecto dos amienses que viven e que coñecen a realidade diaria dos veciños onde existen problemas e inquedanzas que para nada se ven reflectidas nas páxinas deste xornal”.
Os tres partidos lamentan que se omitan cuestións tan importantes como a reprobación do edil do BNG David Santomil, as grandes deficiencias na xestión do ciclo integral da auga, o abandono sen precedentes do rural, ou a omisión deliberada do núcleo máis poboado de Ames, O Milladoiro. Enganden que trátase “dun panfleto propagandístico que omite, ademais, a suba de impostos, os 900.000 € de contratos a dedo feitos polo tripartito, ou cando deixaron sen Nadal á veciñanza o pasado 2017”.
Os grupos denuncian ademais que a publicación “tampouco fai referencia ás numerosas demandas que ten que afrontar o concello como consecuencia dunha RPT ruinosa que ameaza con indemnizacións millonarias ás contas municipais, omite o fracaso dun orzamento que deixa claro que non teñen modelo de xestión, omite todas as iniciativas presentadas polo concelleiro Javier López, o Partido Popular e Pacto X Ames, iniciativas que teñen unha gran repercusión para o funcionamento do concello e omite que están en minoría e polo tanto, non poderían sacar a diante nestes dous anos e medio a maioría das iniciativas se non fora pola colaboración da oposición”.