Frades avanza na construción dun centro socio comunitario en Ponte Carreira

0

Frades, 10 de marzo do 2020 – O concello de Frades ven de aprobar en pleno a sinatura dun convenio para a construción dun centro socio comunitario en Ponte Carreira.

O investimento no local de Ponte Carreira será de 350.000 euros e o acordo de convenio con Política Social, que aporta 200.000 euros do total, aprobouse cos votos a favor do PP e os negativos de Psoe e BNG.

Frades avanza na construción dun centro socio comunitario en Ponte CarreiraO alcalde de Frades, Roberto Rey, explicou que “este centro sociocomunitario sería para uso e desfrute de toda a veciñanza, pero especialmente das persoas maiores de sesenta anos. Un lugar onde poderían ter acceso aos servizos que xa presta o Concello de Frades como podoloxía ou fisioterapia, e tamén facer todo tipo de actividades, incluso algunhas das que xa están en marcha como a ximnasia de mantemento, pero nun local máis acolledor ca un pavillón”. “Non é un centro de día”, remarcou Rey Martínez, “pero por iso estará aberto a todas as persoas maiores e non só aos dependentes de grao 2 ou 3, dos que só temos catro casos interesados  en Frades”.

A Xunta de Galicia achegará 200.000 euros nos exercicios 2020 e 2021, con cargo ao Consorcio Galego de Servizos de Igualdade e Benestar, mentres que o Concello de Frades se fará cargo dos 150.000 euros restantes. Así mesmo, o Concello será o encargado de xestionar o centro e de organizar actividades nel para os maiores, que representan o 42% da poboación do municipio.

O centro constará de dúas salas multiusos, catro despachos, unha recepción cun pequeno almacén e aseos adaptados. Tanto as salas multiusos coma os despachos estarán divididos a través de paneis móbiles, o que permitiría unilos entre si para crear salas de maiores dimensións para cando a actividade así o requira. Exteriormente, o edificio será un paralelepípedo, cun revestimento da fachada en paneis de aluminio en diferentes cores e un zócalo de granito inferior.

Debate

A construción do centro socio comunitario de Ponte Carreira saíu adiante cos 7 votos a favor do PP e cos 4 votos en contra de PSOE e BNG, que pedían a construción dun centro de día. O voceiro do PSOE, Enrique Astray Otero, xustificou o seu voto en contra en que “consideramos máis ambicioso o centro de día” e lamentou que “a Xunta cambiou de idea sobre o centro de día e o Concello tamén”. Roberto Rey lembroulle que “o centro de día foi algo que todos os concellos pediron no seu momento. Pero dende que tomei posesión como alcalde e tras varias reunións na Consellería, puiden comprobar que a realidade é que hai centros de día na nosa área de influencia, como Cerceda ou Curtis, que non teñen as prazas cubertas. En Frades temos só 4 persoas usuarias potenciais dese centro de día, dos cerca de 50 que terían dereito,  interesadas en acudir. A maioría queren máis horas de Servizo de Axuda no Fogar. E a Xunta está a aumentar as horas deste servizo”.

Ademais, o alcalde lembrou que “se facemos un centro de día en Frades, irían eses 4 veciños interesados  en Frades, o resto sería xente de fora. Pero o Concello sería quen tería que asumir os gastos. Por iso entendemos que un centro socio comunitario dará un mellor servizo aos nosos maiores, que podería verse complementado pola próxima apertura dunha Casa do Maior, que xestiona unha emprendedora do municipio”.

Pola súa banda, o voceiro do BNG, Manuel Míguez Villaverde, lembrou que “o centro de día se empezou a tramitar co bipartito. Anxo Quintana doulle para adiante pero, como dixo o anterior alcalde, foise moi lento, algo que eu mesmo teño que recoñecer. Pero chegou o Goberno Feijoo, o recuperou e mesmo chegou a poñer un cartel de obras na parcela”. Pola súa banda, o voceiro do PP, Manuel Ferreiro, puntualizou que, aínda que Anxo Quintana fora o representante do BNG máis comprometido con Frades durante o bipartito, “o que nos dixo foi que compraramos o terreo para facer o centro de día e, cando o fixemos, non nos recibiu durante máis de dous anos. Iso é vender fume”.

Resto da sesión

No que atinxe ao resto da sesión ordinaria de marzo, trasladada do venres ao sábado para así poder incluír tamén o sorteo das mesas electorais, os tres grupos aprobaron por unanimidade o inicio do expediente de desafectación de dous camiños municipais en desuso en Asemonde e Loira-Cheda, que será cambiado por un camiño particular e por unha finca en Moar. Tamén se aprobou por unanimidade unha moción do PSOE, emendada polo grupo de Goberno, na que se insta á Xunta a non recortar o Plan de Mellora de Camiños Rurais. “A redución en Frades é do 28%. Nos anos pasados destinábanse 59.000 euros e para 2020 prevense 42.500 euros”, apuntou Enrique Astray.

O concelleiro de Economía, Manuel Ferreiro, aceptou o fondo da moción, se ben lembrou que a Consellería de Medio Rural investiu máis de 100.000 euros no pasado exercicio para a reconstrución de 4 pontes en camiños rurais Frades. A maiores, o PP engadiu dous puntos á moción para pedirlle á Xunta que os seis millóns de euros que adoitan quedar sen adxudicar nese Plan se acheguen aos Concellos que, como Frades, si fan uso deses investimentos e que se teñan en conta os quilómetros de pistas rurais que ten cada municipio á hora de decidir as cantidades das achegas.

As outras dúas mocións do PP saíron adiante pero sen o consenso dos tres grupos. A primeira delas era para solicitarlle á Deputación da Coruña a súa colaboración na construción do centro sociocomunitario de Frades, que foi aprobada coa abstención dos dous grupos da oposición, que volveron insistir na necesidade de apostar por un centro de día. Rey Martínez explicou que “imos solicitar a colaboración primeiro da Deputación e, despois, de fondos estatais e doutras consellerías. Se non os conseguirmos, pediremos un préstamo”.

Finalmente, o Pleno aprobou, cos votos a favor de PP e BNG e cos votos en contra do PSOE, instar ao Goberno de España a aboar a Galicia os 200 millóns de euros que reclama polo IVE e os 170 millóns de euros polo cumprimento dos obxectivos de déficit.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial