Frades, 17 de xullo do 2019 – A Deputación da Coruña ven de remitir unha nota na que explica que os desbroces, das estradas da súa competencia, en Frades comezaron onte luns.
A Deputación aclara que os traballos iniciáronse na estrada provincial 3802 en Pontecarreira e continuarán ata rematar en Ordes. A continuación comezarase a da estrada DP 3801 de Sigüeiro a Cimadevila.
O organismo provincial tamén aclara que os efectivos de desbroce están traballando a pleno rendemento, pero deben atender os máis de 1.100 quilómetros da rede provincial de estradas nos 93 concellos da provincia.
Co obxectivo de mellorar o servizo de desbroce das estradas provinciais, o goberno provincial decidiu hai tres anos que este servizo fose obxecto dun programa exclusivo (antes ía incluído no Plan de Conservación) no que a Deputación inviste 2 millóns de euros anuais só para este fin e que contribuíu a axilizar e mellorar este servizo, incluíndo rozas periódicas para que as estradas da rede provincial estean nas mellores condicións de seguridade para peóns e condutores.